Matthew McConaughey

Matthew McConaughey
L'actor Matthew McConaughey en una imachen de 2019.
Información personal
Nombre real	Matthew David McConaughey
Calendata naiximiento:	4 de noviembre de 1969
Puesto naiximiento:	Uvalde (Texas, Estaus Unius)
Ocupación:	Actor
Alma Máter	Universidat de Texas
Conchuche:	Camila Alves (2012- )
Fillos:	3
Premios Oscar

Oscar a o Millor Actor: -2013: por Dallas Buyers Club.
Globos d'Oro

Globo d'Oro a lo Millor Actor Dramatico: -2014: por Dallas Buyers Club. Nominau a lo Globo d'Oro a lo Millor Actor de Miniseries u Telefilmes -2014: por True Detective
Premios Emmy

Premio Primetime Emmy a lo Millor Actor en Serie Dramatica -2014: por True Detective

Matthew David McConaughey (/məˈkɒnəheɪ/ mə-KON-ə-hay), naixiu d'Uvalde (Texas, Estaus Unius) o 4 de noviembre de 1969, ye un actor estausunidense, activo en o cine estausunidense dende primerías d'os anyos 1990 y con una destacada carrera cinematografica. O suyo primer papel destacau estió en a cinta de comedia Dazed and Confused en 1993 (Richard Linklater).^[1]^[2]^[3] Dimpués de cualques papels como actor segundario, o suyo primer exito interpretativo estió en a cinta dramatica de cine de chudicios A Time to Kill, en 1996 (Joel Schumacher). A suya carrera progresó con as suyas interpretacions en a cinta de ciencia-ficción Contact en 1997 (Robert Zemeckis), con a cinta dramatica Amistad en 1997 (Steven Spielberg) y con a cinta de cine belico U-571 en l'anyo 2000 (Jonathan Mostow).

En os anyos 2000, McConaughey destacó en interpretando papels en cintas de comedia de cine romantico, protagonizando cintas como The Wedding Planner (2001, Adam Shankman), How to Lose a Guy in 10 Days (2003, Donald Petrie), Failure to Launch (2006, Tom Dey), Fool's Gold (2008, Andy Tennant) y Ghosts of Girlfriends Past (2009, Mark Waters), convertindo-se asinas en un sex symbol.^[4] En 2011, dimpués de dos anyadas d'inactividat en o mundo d'o cine, McConaughey pasó a interpretar papels mas dramaticos, como lo drama chudicial The Lincoln Lawyer (2011, Brad Furman), la comedia negra Bernie (2011, Richard Linklater), u la cinta de cine policiaco Killer Joe (2011, William Friedkin). En 2012 recibió muitos parabiens por os suyos papels de stripper en Magic Mike y d'un fuchitivo en Mud.^[5]

O papel de McConaughey de Ron Woodroof, un cowboy diagnosticau de SIDA, en o biopic Dallas Buyers Club (2013, Jean-Marc Vallée) estió amplament elochiau por a critica cinematografica y li comportó muitos reconoiximientos y parabiens, incluyindo-ie l'Oscar a lo Millor Actor. Dimpués continó con un papel segundario en The Wolf of Wall Street (2013, Martin Scorsese), y con o papel protagonista de Rust Cohle en a primera temporada d'a serie de televisión d'HBO True Detective (2014), una serie policiaca, que li comportó la suya nominación a lo Premio Primetime Emmy a lo Millor Actor en Serie Dramatica. En as suyas siguients cintas tenió diferents rans d'exito comercial y d'a critica, pero se pueden destacar as suyas interpretacions en Interstellar (2014, Christopher Nolan) y The Gentlemen (2019, Guy Ritchie), y os suyos papels como actor de voz en Kubo and the Two Strings (2016, Travis Knight), Sing (2016, Garth Jennings) y la suya secuela Sing 2 (2021, Garth Jennings).